Флэш-мобы будуць праводзіцца арганізавана

Апошнія месяцы такая форма выраза мірнага пратэсту як флэш-моб, становіцца ў Беларусі ўсё больш папулярнай. Зараз на базе штаба руху дэмакратычных пераменаў “За волю” ствараецца цэнтр па правядзенні акцый мірнага пратэсту — палітычных флэш-мобаў.
Па паведамленні сайта лідэра аб’яднаных дэмакратычных сіл, экс-кандыдата ў прэзідэнты Аляксандра Мілінкевіча, плануецца, што цэнтр будзе каардынаваць дзейнасць усіх ініцыятараў і ўдзельнікаў флэш-мобаў, а таксама стане банкам ідэй, дзе кожны зможа прапанаваць свой варыянт правядзення акцый. У метах бяспекі ўдзельнікаў акцый, іх канцэпцыя будзе разглядацца юрыстамі на прадмет адпаведнасці беларускаму заканадаўству. Пры гэтым будуць строга выконвацца правілы ананімнасці і бяспекі, каб месца і час правядзення флэш-мобаў было вядома толькі непасрэдным яго ўдзельнікам.

Цэнтр не збіраецца абмяжоўваць сваю дзейнасць арганізацыяй флэш-мобаў. Створаны з ліку добраахвотнікаў, ён дасць магчымасць праводзіць і іншыя акцыі, у тым ліку масавыя, паведамляецца на сайце А.Мілінкевіча.

Паводле сайту http://by.milinkevich.org/
і БелаПАН