За Сусветны дзень волі прэсы

3 траўня ў Мінску, у пасольстве Латвіі, адбыўся святочны сход, прысвечаны Сусветнаму дню волі прэсы. У мерапрыемстве прынялі ўдзел журналісты беларускіх незалежных СМІ, амбасадары і дыпламаты шэрагу дзяржаў, прадстаўнікі міжнародных арганізацый.

Кіраўнік прадстаўніцтва ААН у Беларусі Джыхан Султанаглу распавяла аб гісторыі заснавання свята вольнай прэсы і тым значэнні, якое ААН надае праблеме абароны правоў чалавека на атрыманне праўдзівай інфармацыі. “Арганізацыя Аб’яднаных Нацый лічыць незалежныя СМІ неад’емным элементам дэмакратычнага грамадства”, — падкрэсліла Д.Султанаглу.

Па прапанове амбасадара ЗША Джорджа Крола прысутныя ўшанавалі хвілінай маўчання памяць журналістаў, што загінулі ў барацьбе за дэмакратыю і волю ў розных краінах.

Па словах кіраўніка Беларускай асацыяцыі журналістаў (БАЖ) Жанны Ліцвіной, Сусветны дзень волі прэсы выклікае ў яе дваістыя пачуцці. З аднаго боку, гэта “свята ўсіх журналістаў, якія верныя сваёй прафесіі”, з іншага — лішняя падстава ўзгадаць аб надзённых праблемах нашых журналістаў.

Ж.Ліцвіна нагадала аб вядомых фактах рэпрэсій супраць прадстаўнікоў СМІ ў Беларусі, зачыненні газет, адмове незалежным выданням у доступе да манапалізаванай дзяржавай сістэме распаўсюджвання. Кіраўнік БАЖ са шкадаваннем адзначыла, што ў розных спісах Беларусь суседнічае з краінамі, дзе сітуацыя са свабодай слова найбольш неспрыяльная.

Тым не менш Ж.Ліцвіна ўпэўнена, што наступіць дзень, калі Сусветны дзень волі прэсы “будзе шырока і адчынена адзначацца ў вольнай Беларусі”.

Гэту думку падтрымала і “гаспадыня” мерапрыемства, пасол Латвіі Майра Мару, якая прапанавала лічыць збор у сценах сваёй амбасады “авансам” будучых урачыстасцяў з нагоды Сусветнага дня волі прэсы.

БелаПАН