Адамкус, Саакашвілі і Юшчанка абмяркуюць з Чэйні Лукашэнку

4 і 5 траўня ў Вільнюсе пройдуць саміт лідэраў краін Балтыйска-Чарнаморскага рэгіёна, а таксама форум Садружнасці дэмакратычнага выбару (СДВ), арганізаванага ў пачатку снежня мінулага года і названага аналітыкамі альтэрнатыўным СНД. У СДВ уваходзяць 9 краін: Украіна, Малдова, Літва, Латвія, Эстонія і Грузія (з былога СССР), плюс Румынія, Македонія, Славенія (з былога сацлагеру).

Акрамя лідэраў гэтых краін, у Вільнюс з’язджаюцца кіраўнікі Балгарыі і Азербайджана, прадстаўнікі НАТА, ЕС і ЗША, у прыватнасці віцэ-прэзідэнт ЗША Дзік Чэйні.

Размова на саміце лідэраў краін Садружнасці дэмакратычнага выбару пойдзе аб эканамічных і палітычных працэсах у рэгіёне. Напэўна вызначаная ўвага будзе нададзена і праблеме дэмакратызацыі Беларусі, якая геаграфічна магла бы быць у СДВ.

Краіны, што ўтварылі ў канцы 2005 года гэтую структуру, абвясцілі тады аб намеры цесна супрацоўнічаць “для дасягнення трывалага міру, дэмакратыі і росквіту на еўрапейскім кантыненце”.

“Мы шчыра спадзяемся, што перспектыўная місія Садружнасці дэмакратычнага выбару будзе служыць аб’яднанню ўсіх краін рэгіёна ў іх сумесных намаганнях па ўмацаванню нашага рэгіянальнага супрацоўніцтва, спрыяць дэмакратыі і абароне правоў чалавека”, — гаварылася ў дэкларацыі аб стварэнні Садружнасці дэмакратычнага выбару.

Паміж тым сваё меркаванне аб СДВ адразу пасля яго арганізацыі выказаў прэзідэнт Беларусі. І даволі крытычнае. Па меркаванню Аляксандра Лукашэнкі, у Садружнасці дэмакратычнага выбару няма будучыні.

“Вылучылі так званую дэмакратыю — ідзіце гэтым шляхам. Навошта выступаць супраць Усходу і ісці на Захад? Па-першае, на Захадзе яны нікому не патрэбныя. ЕС трэба “перажываць”, “пераварыць” усходне-еўрапейскія дзяржавы, якія нядаўна далучыліся. Па-другое, з чым яны ідуць на Захад? Што яны прынясуць? Злачыннасць, разбой, бандытызм? Пакажуць, як трэба захопліваць уладу неканстытуцыйным шляхам? Еўропа гэтага не жадае. Калі нейкія еўрапейскія лідэры і падтрымаюць такія справы, то толькі ў іншых дзяржавах, а не ў сваіх”, — лічыць Лукашэнка.

http://www.naviny.by