Еўрасаюз прыме санкцыі супраць А.Лукашэнка і яшчэ 30 чыноўнікаў

Агенцтва Reuters са спасылкай на еўрапейскіх дыпламатаў паведамляе, што Еўрасаюз падрыхтаваў рашэнне аб забароне на ўезд у краіны Саюза Аляксандру Лукашэнку і яшчэ 30 беларускім чыноўнікам. Сярод іх – міністры, дэпутаты парламенту, чальцы прэзідэнцкай адміністрацыі і сябры выбарчых камісіяў.

Прычына санкцыяў – прэзідэнцкія выбары ў Беларусі, якія Еўрасаюз расцаніў, як неадпаведныя дэмакратычным стандартам. У 2004 годзе Еўрасаюз ужо ўвёў візавыя санкцыі супраць 4-х беларускіх асобаў, падазраваных у датычнасці да знікнення апазіцыйных палітыкаў.

Афіцыйна рашэнне аб візавых санкцыях будзе ўхваленае на чарговай нарадзе міністраў замежных спраў Еўрасаюзу, якая адбудзецца 10 красавіка ў Люксембургу. Дыпламатычныя крыніцы агенцтва Reuters паведамілі, што на гэтай нарадзе ня будзе разглядацца прапанова аб замарожванні асабістых рахункаў беларускіх чыноўнікаў, але суразмоўцы агенцтва ня выключылі, што гэтыя меры могуць быць прынятыя ў будучыні.

Разам з тым была адхіленая прапанова запрасіць на міністэрскую нараду ў Люксембургу Аляксандра Мілінкевіча. Reuters, са спасылкай на дыпламатычныя крыніцы паведамляе, што магчыма, беларускі палітык можа быць запрошаны пазней.

Радыё “Свабода”