Зарэгістраваны чатыры кандыдаты ў прэзідэнты

Сёння, у 12 гадзін, у Палацы Рэспублікі, Цэнтральная Выбарчая камісія зарэгістравала ўсіх прэтэндэнтаў на пасаду прэзідэнта. І так, чатыры кандыдата: Аляксандр Мілінкевіч, Аляксандр Лукашэнка, Аляксандр Казулін і Сяргей Гайдукевіч. Выбаршчыкі! Вам засталося толькі вырашыць для сябе за каго вы і пайсці на выбары.

Акрамя галасавання камісіі ЦВК і зацвярджэння кандыдатур, у Палацы Рэспублікі падчас афіцыйнай часткі кандыдатам быў дадзены час для прамоў. Па ацэнцы прысутных журналістаў прамова спадара Мілінкевіча многіх уразіла, бо была змястоўнай і на чыстай беларускай мове. Прамова Аляксандра Казуліна перабольшыла па часе і была на рускай мове. Абодва выступоўцы даволі крытычна выказваліся па сучаснай палітычнай сітуацыі ў Беларусі, але Аляксандр Лукашэнка на гэта не адрэагаваў, а падчас свайго выступу казаў аб захаванні стабільнасці ў краіне. Прамова ж спадара Сяргея Гайдукевіча складалася з падзякі сваім прыхільнікам.

Пакуль адбывалася афіцыйная частка рэгістрацыі, на плошчы, каля Палаца Рэспублікі, сабралася каля 200 прыхільнікаў Аляксандра Мілінкевіча. Ён яшчэ за два дні да гэтага абвясціў, што будзе чакаць іх на сустрэчу каля Палаца. Нават былі актывісты рэгіёнаў, з плакатамі: “Жодзіна за Мілінкевіча!”, “Мілінкевіч – Рэчыца з табой!” і інш. Ды яшчэ надавала ўражанне вялікая колькасць супрацоўнікаў службаў бяспекі, якія у штацкім, але не хаваючыся ачапілі квартал і “трымалі сітуацыю пад кантролем”.

Інфармацыйная служба
МГА “ЗБС “Бацькаўшчына”