БЕЛАРУСАМ ЗАМЕЖЖА СКАСАВАНЫЯ ІЛЬГОТЫ

Паступаць ў беларускія навучальныя установы ім прыйдзецца на агульнай аснове

Указам Прэзідэнта Рэспублікі Беларусь № 80 ад 07.02.2005 зменены парадак паступлення ў вышэйшыя і сярэднія навучальныя ўстановы Рэспублікі Беларусь беларусаў замежжа.

Па прынятых Правілах, беларусы замежжа будуць паступаць у ВНУ і сярэдне-спецыяльныя ўстановы на тых жа ўмовах, што і грамадзяне Рэспублікі Беларусь -- на конкурснай аснове. Такое ж права атрымалі і грамадзяне Расійскай Федэрацыі, Кыргызскай Рэспублікі, Рэспублікі Таджыкістан, Рэспублікі Казахстан. Пры паступленні беларусам замежжа трэба будзе прадстаўляць дакументы, пацвярджаючыя беларускую нацыянальнасць.

Калі Правілы пачнуць дзейнічаць без змяненняў, то яны фактычна скасоўваюць існаваўшыя раней ільготы на атрыманне бясплатнай адукацыі (за кошт бюджэту). Нагадаем, што ў 1993 г. Саветам Міністраў Рэспублікі Беларусь была зацверджана Праграма "Беларусы ў свеце", у адпаведнасці з якой дзяржава давала магчымасць беларусам замежжа атрымліваць адукацыю ў навучальных установах Рэспублікі Беларусь бясплатна і па-за конкурсам. Дакументам, які сведчыў пра беларускае паходжанне будучага абітурыента было хадайніцтва ад суполкі беларускай дыяспары.

Кожны год у навучальныя ўстановы Беларусі паступаюць дзесяткі тысяч абітурыентаў, колькасць жа навучэнцаў з дыяспары ніколі не перавышала ста чалавек. Такім чынам навучанне суайчыннікаў не клалася цяжкім фінансавым грузам на рэспубліканскі бюджэт, і што найбольш значна, спрыяла павышэнню аўтарытэту нашай краіны, сведчыла пра клопат аб беларусах замежжа.

МГА ЗБС “Бацькаўшчына” выказвае занепакоенасць зменамі ў Правілах паступлення ў навучальныя ўстановы, якія могуць сур’езна абмежаваць магчымасці для моладзі з беларускага замежжа навучацца ў беларускіх ВНУ.

прэс-служба МГА “ЗБС “Бацькаўшчына”