Спрэчкі працягваюцца, а TV і радыё для Беларусі так і няма

Польскі бок не пагаджаецца з вынікамі конкурсу на права тэле- і радыёвяшчання на Беларусь, абвешчанага Еўрапейскай камісіяй. Дэпутат Еўрапарламенту ад Польшчы Богдан Кліх, лічыць, што прапанова кансорцыума, які выйграў права рэалізоўваць дадзены праект, горшая чым прапанова польскага боку. Дэпутат звярнуўся з адпаведнай скаргай да еўракамісара Беніты Ферэра-Вальднэр.

Нагадаем, што паводле агучаных вынікаў пераможцам конкурсу, які прадугледжвае, між іншага, засваенне 2 мільёнаў еўра стаў міжнародны кансорцыум, які ўзначальвае нямецкая кампанія “Media Consult”. Выканаўцамі праекту меліся быць расійскае сатэлітнае тэлебачанне RTVi і зарэгістраванае ў Польшчы Еўрапейскае Радыё для Беларусі (ЕБР).

Польскі бок лічыць, што згаданы кансорцыум падчас конкурсу змяніў уласны праект, чаго ў сваю чаргу не было дазволена польскаму боку. На пачатку было вядома, што кансорцыум складаюць “Media Consult” і тэлебачанне TV Centre. Багдан Кліх абвінавачвае Еўрапейскую Камісію ў тым, што яна дапусціла змену ўдзельнікаў кансорцыума непасрэдна ў працэсе конкурсу і адкінула лепшую прапанову з боку Польскага тэлебачання і Радыё Беласток.

Камісія абвяргае гэтыя абвінавачванні.

“Кампаніі, раней узгаданыя, з’яўляюцца толькі выканаўцамі. Удзельнікамі кансорцыум надалей застаюцца “Media Consult” і TV Centre”, — сцвярджае Эма Удвін, прэсавы сакратар камісара Ферэра-Вальднэр. Але яна не пажадала сказаць, якім чынам будзе размеркавана праца і грошы паміж удзельнікамі кансорцыума.

“Кантракт яшчэ не падпісаны, а ўмовы яго выканання патрабуюць даверу да ўсіх удзельнікаў”, — адзначыла Эма Удвін. Правілы праекту патрабуюць ад кампаній, якія ўваходзяць у кансорцыум, выканання 55 адсоткаў усіх прац. Гэта азначае, што толькі 45 адсоткаў сумы, якая выдаткоўваецца на рэалізацыю ўсяго праекту, патрапіць да тых, хто будзе надаваць вяшчанне: RTVi і ЕБР.

Лідэр аб’яднаных дэмакратычных сіл Беларусі Аляксандр Мілінкевіч, які знаходзіўся на мінулым тыдні з візітам у Бруселі, вельмі здзівіўся, што ніхто не пацікавіўся пазіцыяй беларускай апазіцыі ў дачыненні да згаданага конкурса. “Наш голас, безумоўна, не павінен быць галоўным падчас прыняцця гэтага рашэння, але выслухаць нашую пазіцыю было неабходна”, — выказаўся Аляксандр Мілінкевіч. Ён размаўляў з еўракамісарам на працягу гадзіны і выказаў агулам станоўчае стаўленне да медыя-праектаў, якія будуць накіраваны на арганізацыю незалежнага вяшчання для Беларусі.

Паводле www.bialorus.pl і
www.rzeczpospolita.pl