Паслу Беларусі ў Польшчы адмовілі у сустрэчы

24 студзеня ў Польшчы адбыўся беспрэцэдэнтны выпадак. Маршалак Вялікапольскага ваяводства Марэк Возняк (беларускі адпаведнік — старшыня аблвыканкаму) у Познані павінен быў сустрэцца з паслом Беларусі ў Польшчы Паўлам Латушкам у 12.30 у будынку маршалкоўскай управы. Сустрэча не адбылася, маршалак адмовіўся ад запланаванай раней сустрэчы, а замест гэтага сустрэўся з беларускімі актывістамі, якія мелі намер наладзіць пікет пратэсту каля месца сустрэчы маршалка і пасла.

Паводле намесніка дырэктара палітычнага кабінету маршалка Крыстыны Чайкі, ініцыятарам сустрэчы быў беларускі бок. Сёння ў Познані пачаўся буйны будаўнічы кірмаш “Будма”, у якім бяруць удзел і беларускія фірмы, зацікаўленыя ў супрацоўніцтве з польскімі партнёрамі. Гэтаму, паводле спадарыні Чайкі, і павінна была быць прысвечана сустрэча.

“Спатканне ні ў якім разе ня мела б палітычнага характару, — кажа спадарыня Крыстына.— Але калі мы даведаліся, што супраць гэтай сустрэчы плануецца правесці пікет, спадар маршалак вырашыў адмовіцца ад спаткання з паслом. Ён заявіў, што не хацеў, каб тыя людзі, якія ладзілі акцыю пратэсту, мелі праблемы з паліцыяй. Калі пачаліся пытанні, чаму было прынятае такое рашэнне, дык спадар маршалак вырашыў прыняць гасцей”.

Між тым, паводле польскага заканадаўства, на вулічныя акцыі, у якіх бяруць удзел менш чым 15 чалавек, ніякі дазвол ці папярэдняе ўзгадненне з уладамі не патрэбныя, а да ваяводскай управы прышлі менш за 15 асобаў, таму паліцыя ня мела б законных падстаў каб спыніць акцыю.

Адным з сённяшніх гасцей маршалка Марка Возняка быў Віталь Воранаў з Беларускага культурна-асветніцкага цэнтру ў Познані — паводле ягоных словаў, праблемы з паліцыяй гэта толькі афіцыйнае, дыпламатычнае тлумачэнне. Гэтая арганізацыя, а таксама некалькі іншых, калі даведаліся пра сустрэчу маршалка з беларускім паслом, вырашылі правесці акцыю пратэсту. Паводле спадара Воранава, тое, што маршалак адмовіўся ад сустрэчы з паслом, але прыняў беларускіх актывістаў, вельмі сімвалічна.

Віталь Воранаў пракаментаваў гэта так: “Нечакана нас запрасіў спадар маршалак. Ён адмовіўся ад сустрэчы з амбасадарам, але прыняў прадстаўнікоў Беларускага культурна-асветніцкага цэнтру. Пытаўся пра тое, чым мы займаемся, як можа дапамагчы ў будучым. Маршалак сказаў, што ён асабіста быў на Майдане ў Кіеве і жадае беларусам, каб у нас адбылося тое ж самае. Тое, што спадар Возняк прыняў замест пасла прадстаўнікоў беларускай арганізацыі, якая стаіць у выразнай апазіцыі да цяперашніх уладаў, гэта вельмі сімвалічна і важна для нас”.

Аляксей Дзікавіцкі