Беларусь + Венесуэла

Нядаўна ў Беларусі з візітам знаходзіўся міністр замежных спраў Венесуэлы Алі Радрыгес Араке. Ён правёў перамовы са сваім беларускім калегам Сяргеем Мартынавым і прэзідэнтам Беларусі Аляксандрам Лукашэнкам.

У цэнтры ўвагі была арганізацыя двухбаковых сустрэч на вышэйшым узроўні. Пасля чаго Сяргей Мартынаў паведаміў, што падрыхтоўка перамоваў Уга Чавэса і Аляксандра Лукашэнкі пачалася. У той жа час Аляксандр Лукашэнка распавядаў перад Венесуэльскім кіраўніцтвам аб адзінстве поглядаў на сітуацыю ў свеце. Разам з Венесуэлай Лукашэнка намерваўся змагацца за ўсталяванне больш справядлівага светаўпарадкавання. Таксама беларускі прэзідэнт абяцаў Венесуэле дапамагчы адстойваць яе інтарэсы на еўрапейскім рынку.

“Немецкая волна” крытычна адрэагавала на такія заявы: “З гэтым Аляксандр Лукашэнка перабольшыў. А калі ўдакладніць, то гэта вельмі падобна на блеф. Кіраўнік дзяржавы, якому пагражаюць жорсткія эканамічныя санкцыі, і які сам даўно разглядаецца ў Еўропе як ізгой, наўрад ці можа прапанаваць там некія магчымасці.

Яшчэ больш цікавымі выглядаюць заявы Лукашэнка аб “адзінстве поглядаў Беларусі і Венесуэлы на існуючае становішча рэчаў у свеце”. Сістэма дзяржаўнага кіравання, заснаваная прэзідэнтам у Беларусі, вельмі экзатычна выглядае толькі на фоне Еўропы і ў самой Еўропе, але зусім не ва ўсім свеце. Лацінскую Амерыку гэтым не здзівіш. Там амаль ўсе краіны прайшлі праз ваенныя перавароты, парушэнні правоў і свабод чалавека, праз сілавое ўтрыманне дзяржаўнай ўлады. На Кубе да гэтага часу існуе камуністычны рэжым Фідэля Кастры — яшчэ аднаго вялікага сябра кіраўніка беларускай дзяржавы”.

Не абышоўся выступ прэзідэнта без каментара з боку “Нашай Нівы”, ад аглядальніка газеты Лёліка Ушкіна, які нядаўна правёў тыдзень у Венесуэле. Ён называе параўнанні беларускага і венесуэльскага рэжыму некарэктнымі. На ягоную думку, параўнанне ўзроўню дэмакратыі ў дзвюх краінах на карысць Венесуэлы: “Гэта абсалютна не дыктатура, і я гэта прынцыпова падкрэсліваю. У краіне існуе парламент, у краіне існуе свабода прэсы, у краіне 4 незалежныя тэлеканалы, якія ад ранку да вечара паліваюць Чавэса брудам. Калі б вы паглядзелі, што пішацца там у “Еl Nacional” альбо “Universal” – гэта лідэры мясцовай дэмакратычнай прэсы – яны пішуць абсалютна ўсё што заўгодна і няма ніякіх праблемаў з уладай”.

Канешне, і да гэтага некаторыя аналітыкі называлі сітуацыю ў Беларусі разнавіднасцю лацінаамерыканскага варыянта. Сёння Аляксандр Лукашэнка проста зацвердзіў гэта з дадзенай яму адкрытасцю. Аднак, колькі не кажы аб адзінстве з Венесуэлай, у Лацінскую Амерыку Беларусь не перацягнеш — яна застанецца еўрапейскай краінай. Пакуль — хаця б толькі геаграфічна.

Інфармацыйны цэнтр МГА “ЗБС “Бацькаўшчына”
Паводле Радыё “Свабода” і "Немецкая волна"