Сусветная акцыя салідарнасці

Дванаццаць кіламетраў ішлі маршам студэнты у падтрымку дэмакратычных арганізацый у Беларусі прайшлі 15 кастрычніка ў Вялікабрытаніі, Канадзе, Польшчы, ЗША, Турцыі, Непале, Гане, на Тайвані і ў ЮАР. Аб гэтым паведаміла газета “Беларусы і рынак”. Мэта маршаў была падтрымка беларусаў у пабудове дэмакратыі і прыцягненне амерыканцаў і жыхароў іншых краін да “глабальнай дэмакратычнай плыні”.

Студэнты ў суботу пешшу ішлі па сталіцах сваіх краін, апрануўшы майкі з беларускай сімволікай і трымаючы ў руках транспаранты і плакаты са слоганамі накшталт: “студэнты за глабальную дэмакратызацыю” (SGD — Students for Global Democracy). Дванаццаці кіламетрам маршруту быў нададзены сімвалічны сэнс — колькасць год, якія прэзідэнт Беларусі правядзе на сваёй пасадзе, да часу выбараў 2006 года.

Накірункі маршаў выбіраліся каардынатарамі на месцах. На прыклад, у Лондане марш пачынаўся каля амбасады Кыргыстана і працягваўся праз амбасады Украіны, Грузіі (як краін “пераможных рэвалюцый”), а так сама Арменіі, Расіі і Эстоніі і скончыўся ля амбасады Беларусі.

Дарэчы, у брытанскіх студэнтаў не было магчымасці атрымаць амерыканскія футболкі з беларускай сімволікай (кошт кожнай быў 15 USD), таму яны размалёўваліся і самі рабілі сабе плакаты.

Шаснаццатага ж кастрычніка акцыі салідарнасці прайшлі ў бліжнім замежжы.

Напрыклад акцыя салідарнасці, з сем’ямі зніклых беларускіх палітыкаў, сем’ямі палітвязняў і ўсімі, хто змагаецца за дэмакратыю ў Беларусі, адбылася ў Варшаве і Познані. А арганізавана яна была Культурна-Асветніцкім Цэнтрам у Познані (ад якога нам былі дасланы фотаздымкі). Падобныя акцыі ў той самы час адбыліся ў Беластоку, Лодзі, Гдыні і Уроцлаве.

Каля сотні, ў асноўным маладых людзей, прыйшлі на вуліцу Новы свят – гэта ў самым цэнтры Варшавы. Прысутныя трымалі бела-чырвона-белыя сцягі, транспарант з надпісамі ”Мы салідарныя з Беларуссю”. Удзельнікі акцыі выцягнуліся ў жывы ланцуг ўздоўж “Новага святу”, трымаючы свечкі белага і чырвонага колераў.

Для “Радыё Свабода” даў свае каментарыі Антось Цялежнікаў (адзін з кіраўнікоў Звязу на карысць дэмакратыі ў Беларусі – арганізацыі, якая наладзіла акцыю ў Варшаве): “Як вы бачыце, тут сёння большасць моладзі, студэнтаў, якія яшчэ год таму бралі ўдзел у акцыях у падтрымку ўкраінскай рэвалюцыі. Я спадзяюся, што нашы акцыі, нашы захады прынясуць вынік, падобны да ўкраінскага. Свечка — гэта сімвал надзеі, сімвал надзеі на вольную, дэмакратычную Беларусь”.

Пастаяўшы пэўны час у ланцугу са свечкамі, удзельнікі акцыі з беларускімі нацыянальнымі сцягамі накіраваліся ў бок старога гораду, дзе адбываўся ўрачысты канцэрт з нагоды Дня Папы — свята, якое адзначаецца ў дзень нараджэння Яна Паўла ІІ. Там, каля касцёла святой Ганны, які наведваў Папа ў часе адной са сваіх пілігрымак на радзіму, свечкі былі выстаўленыя ў тры паласы – белую, чырвоную і белую.