“Год Расіі ў Беларусі”.

Такая назва сумеснай акцыі Нацыянальнага музея гісторыі і культуры Беларусі і Дзяржаўнага гістарычнага музея ў Маскве, у межах якой зараз праходзіць выстава “Слуцкія паясы”. Яна была адкрыта 29 верасня ў Нацыянальным музеі гісторыі і культуры Беларусі (вул. Карла Маркса 12). На адкрыцці выставы прысутнічалі намеснік міністра культуры Беларусі Валерый Гедройц, дырэктар Дзяржаўнага гістарычнага музея ў Маскве Аляксандр Шкурко, яго намеснік Тамара Ягумнава, загадчык аддзела Нацыянальнага мастацкага музея Беларусі Ірына Скварцова.

Афіцыйная частка, як заўсёды, складалася з выступленняў афіцыйных прадстаўнікоў. Дарэчы, А.Шкурко паабяцаў і далей працягваць распрацоўваць сумесныя праекты з Беларускімі калегамі.

Легендарныя шоўкавыя паясы, аб якіх пісаў Багдановіч, сабраны на выставу. Чатыры рэліквіі прывезлі з расійскага Дзяржаўнага гістарычнага музея, дзесяць — з беларускіх музеяў. На выставе прадстаўлены паясы з Ліёна, з-пад Варшавы, але сапраўдныя слуцкія пазначаны адмысловымі меткамі на канцах ці збоку. У шырыню паясы 30-35 см, даўжынёй — ад 3 да 5 метраў. У XVIII ст. шоўкавыя паясы лічыліся галоўным убранствам мужчынскага строю. Яго маглі сабе дазволіць толькі прадстаўнікі знатных сямей. І насілі толькі па святочных днях і па асоба важных выпадках.

На выставе ёсць і так званыя “літыя паясы”, у якія ўплецены залатыя альбо срэбраныя ніці, а таксама двухбаковыя паясы. На іх быў попыт заўсёды, бо былі вельмі зручным і эканамічным варыянтам: іх насілі на адзін ці на другі бок, у залежнасці ад выпадкаў, радасных альбо сумных.

Унікальная выстава працягнецца да 13 снежня (толькі экспанаты з расійскага музея выстаўлены да 17 кастрычніка). Кошт поўнага білета 2000 руб., для навучэнцаў школ — 700, студэнтам — 1000, замежным наведвальнікам — 7000.

Дар’я Сацукевіч, прэс-сакратар МГА “ЗБС “Бацькаўшчына”